Kalaallit Nunaanni qinersinermut nunani allani allakkatigut qinersinissaq
Marlunngorneq ulloq 11. marts 2025 Kalaallit Nunaanni Inatsisartunut qinersisoqartussaavoq. Aammattaaq marlunngornermi ulloq 1. april 2025 Kalaallit Nunaanni kommunalbestyrelsinut, nunaqarfinni aqutsisunut ilagiillu sinniisaannut qinersisoqartussaavoq.
Qinersisartut maannangaaq qinersinissanut allakkatigut qinersisinnaalereerput.
Qinersisinnaatitaaneq
Kalaallit Nunaanni qinersinissamut qinersisinnaatitaanissamut piumasaqaatit makkua naammassisimassavatit:
- Minnerpaamik qaammatini arfinilinni Kalaallit Nunaanni najugaqarsimassaatit
- Kalaallit Nunaanni suli najugaqassaatit
- Qinersisartut allassimaffianni ilanngunneqarsimassaatit
- Tamatuma saniatigut Kalaallit Nunaanni Inatsisartunut qinersisinnaanissanut danskisut naalagaaffimmi innuttaassuseqassaatit.
Kalaallit Nunaata avataanut nunassissimaguit, qinersisinnaatitaanerit annaasussaavat aammalu qinersisartut allassimaffiannit peerneqartussaallutit.
Taamaattoq immikkut ittumik inissisimasut qinersisinnaatitaaginnarsinnaapput
Ilinniartut, napparsimasut, folketing-imi ilaasortat aamma Namminersorlutik Oqartussat aallartitai kiisalu inuit tamatumunnga sanilliunneqarsinnaasut, qinersisinnaatitaaginnarsinnaapput. Tamanna aamma taakkua katissimallugu aappaannut aammalu inooqataannut atuuppoq.
Taamaattoq Kalaallit Nunaata avataani nunassikkallarsimanissaq, aammalu Kalaallit Nunaanniit nuunnissat sioqqullugu piffissami sivikinnerpaamik ukiuni marlunni ataqatigiinni Kalaallit Nunaanni najugaqarsimassasutit, piumasaqaataapput. Tamatuma saniatigut Kalaallit Nunaanni kommunimi kingullermik inuit nalunaarsorsimaffianni nalunaarsorsimaffigisimasarni qinersisartut allassimaffianni ilanngunneqarnissaq illit nammineerlutit isumagissagit, piumasaqaataavoq.
Annertunerusut atuarsinnaavatit uani.
Imatut allakkatigut qinersissaatit
Nunani allaniikkuit, nunami sumiifferni danskit imaluunniit kalaallit sinniisoqarfiini suniluunniit allakkatigut qinersisinnaavutit. Kinaassutsimut uppernarsaativit atuuttup (pas, biilersinnaanermut allagartaq il.il.) nassarnissaa eqqaamassavat.
Inatsisartunut qinersinermut taasinerpit piffissaq eqqorlugu apuussinnaanissaa qulakkeerniarlugu, ulloq 4. marts 2025 tikitsinnagu taasissaatit.
Najukkani qinersinermut taasinissamut piffissaqarnerulaarputit, tassami ulloq 25. marts 2025 tikillugu taasisinnaavutit, sulilu taasinerpit ilanngunneqarnissaa qulakkeersinnaallugu.